इंदापूर(प्रतिनिधी-अशोक घोडके): बारामती लोकसभेच्या खासदार सुप्रिया सुळे इंदापूर दौर्‍यावर आल्यानंतर त्यांच्या बरोबर सावली सारखे बरोबर असणारे आ.दत्तात्रय भरणे, राष्ट्रवादी कॉंग्रेस पक्षाचे पुणे जिल्हा अध्यक्ष व तालुकाध्यक्ष यांनी पाठ फिरवली असल्याची टीका भारतीय जनता पक्षाच्या भटके विमुक्त आघाडी पश्चिम महाराष्ट्रचे मा.सरचिटणीस गजानन वाकसे यांनी केली आहे.
दि.11 सप्टेंबर रोजी बारामती लोकसभेच्या खा. सुप्रिया सुळे ह्या नेहमीप्रमाणे इंदापूर तालुका दौर्‍यावरती आल्या होत्या. या दौर्‍याचे इंदापूरचे आमदार, राष्ट्रवादी कॉंगे्रस पक्षाचे जिल्हाध्यक्ष व तालुकाध्यक्ष या अनुपस्थितीवर त्यांनी टीकास्त्र सोडले. वाकसे असेही म्हणाले की, खा. सुप्रिया सुळे यांचा सोशल मीडियावर फोटो वापरण्याचा तसेच नाव घेण्याचा अधिकार आमदारांना राहिलेला नाही असेही ते म्हणाले.
आ.भरणे तसेच राष्ट्रवादीचे इतर पदाधिकारी आता खा. सुळे यांच्या दौर्‍याला दांडी मारु लागल्याने जोरदार चर्चा राष्ट्रवादी कार्यकर्त्यात सुरू झाली आहे. खासदार सुप्रिया सुळे आमच्या नेत्या आहेत, आम्ही सर्व एक आहोत असे जाहीररीत्या सभेत सांगणारे तसेच फ्लेक्सवर खा.सुप्रिया ताईंचे छायाचित्र लावणारे आमदार भरणे व राष्ट्रवादीच्या पदाधिकार्‍यांनी खा.सुप्रिया सुळे यांच्या समवेत जाण्याचे जाणून-बुजून टाळल्याचे दिसून येत आहे. खासदार सुप्रियाताईंच्या गाडीत नेहमी दिसणारे आमदार व पदाधिकार्‍यांनी खा.ताईंच्या दौर्‍याकडे चक्क पाठ फिरवल्याने राष्ट्रवादीच्या अनेक कार्यकर्त्यांनी तीव्र नाराजी व्यक्त केल्याचे दिसत आहे असेही वाकसे नमूद केले.
दरम्यान आमदार भरणे सह राष्ट्रवादी कॉंग्रेसचे पदाधिकारी हे खा. सुळे यांच्या दौर्‍यात अनुपस्थित राहत असल्याने तालुक्यातील जनतेमध्ये व राष्ट्रवादी कार्यकर्त्यांमध्ये तो चर्चेचा विषय झाला आहे.