बारामती(वार्ताहर): सुजाण नागरिक घडण्यासाठी दर्जेदार पूर्वप्राथमिक शिक्षण मिळणे, मुलांची तर्कशुद्ध विचार करण्याची क्षमता निर्माण व्हावी ह्यासाठी अंगणवाडीमध्ये विविध अनुभव व कृतीच्या देण्यासाठी आम्ही सतत प्रयत्नशील असल्याचे मत एकात्मिक बालविकास सेवा योजना, पुणे शहरी प्रकल्प-2 च्या महिला व बालविकास अधिकारी संध्या नगरकर यांनी व्यक्त केले.
एकात्मिक बालविकास सेवा योजना, महिला व बालविकास विभाग, शहरी प्रकल्प व अनुबोध-योजक संस्था, पुणे यांच्या माध्यमातून बारामती व इंदापूर येथील निवडक अंगणवाड्यांमध्ये आयोजित पालक मेळाव्यात नगरकर बोलत होते.
या मेळाव्यासाठी बारामती नगरीच्या माजी नगराध्यक्षा पौर्णिमा तावरे, सुपरवायजर कविता कांबळे, नगरसेविका नीता चव्हाण, अभिजित चव्हाण, रोटरी क्लबच्या नवनिर्वाचित अध्यक्षा दर्शना गुजर इ. उपस्थित होते.
नगरकर पुढे म्हणाल्या की, जास्तीत जास्त पालकांनी आपल्या पाल्याला 3 वर्ष पूर्ण झाल्यास त्याचे नाव अंगणवाडी मध्ये नोंदवावे. अंगणवाड्यांमध्ये पूर्वप्राथमिक गुणवत्ता विकसन प्रकल्प राबवला जात आहे. या प्रकल्पा अंतर्गत घेतल्या जाणार्‍या आकारवर आधारित अभ्यासक्रमाची पालकांना ओळख व्हावी या करिता पालक मेळाव्याचे आयोजन करण्यात आले असल्याचेही त्यांनी सांगितले.
बारामतीमधील पतंगशहानगर, सिद्धेश्वरगल्ली, खाटिकगल्ली, आमराई, कोअर हाउस, इंदापूररोड याठिकाणी पालक मेळावे घेण्यात आले. असेच मेळावे इंदापूर येथील निवडक अंगणवाड्यांमध्ये ही घेण्यात आले.
यावेळी पालकांनी अंगणवाडीमध्ये घेण्यात येणारी वाचन-लेखन पूर्वतयारी, गणित पूर्वतयारी, बोधात्मक व सृजनशील कृती यांसारख्या कृतीची माहिती घेतली व अंगणवाडी मधून दिल्या जाणार्‍या शिक्षणाबद्दल समाधान व्यक्त केले.
अनुबोध पुणे ह्यांच्या मार्गदर्शनाने व योजक संस्था, पुणे यांच्या माध्यमातून राजशी आगम व सोमेश झरकर हा प्रकल्प राबवत आहेत. अनुबोध पुणे संस्थेच्या अंजली गोखले व विद्या घुगरी अंगणवाडी सेविका व मदतनीस यांना पूर्वप्राथमिक गुणवत्ता शिक्षणाचे धडे देत आहेत. विविध कृती, खेळ, गाणी यांच्या माध्यमातून पूर्वप्राथमिक गुणवत्ता शिक्षण तीन ते सहा वयोगटातील मुलांना दिले जात आहे, यासाठी एच.डी.एफ सी लाईफ कंपनी अर्थसहाय्य करीत आहे.
हा कार्यक्रम यशस्वीरीत्या संपन्न होण्यासाठी अंगणवाडी सेविका व मदतनीस यांनी मोलाचे योगदान दिले. हा मेळावा अंगणवाडी क्रमांक 91 इंदापूर रोड येथे संपन्न झाला. या मेळाव्यास 550 पालकांनी उत्स्फुर्तपणे उपस्थिती दर्शवली.