इंदापूर (प्रतिनिधी-अशोक घोडके) : एक चाक डाव टाकीत पै.सिकंदर शेखने जम्मूच्या पै.अमीन बनियाला अस्मान दाखविले व शहाजी केसरी किताब पटकाविला. प्रेक्षक श्र्वास धरून कुस्ती पाहत होते. दोन अतिशय तुल्यबळ पैलवानांमधील कुस्ती पै.सिकंदर शेख याने मारली तेव्हा प्रेक्षकांनी भला मोठा श्र्वास घेतला आणि सर्व मैदान सिकंदर शेखच्या जयघोषाने दणाणून गेले.
निरा भिमा सहकारी साखर कारखाना शहाजीनगर (ता.इंदापूर) येथे लोकनेते कै.शहाजीराव पाटील यांच्या 44 व्या पुण्यतिथी दिनानिमित्त कारखान्याचे संस्थापक व माजी मंत्री भाजप नेते हर्षवर्धन पाटील यांचे मार्गदर्शनाखाली शहाजी केसरी कुस्ती आखाड्याचे आयोजन करण्यात आले होते.
माजी उपमुख्यमंत्री विजयसिंह मोहिते पाटील व हर्षवर्धन पाटील यांचे हस्ते शहाजी केसरी किताबासाठी पै. सिकंदर शेख व जम्मूचा पै.अमीन बनिया यांच्यामध्ये कुस्ती लावण्यात आली.
कुस्तीच्या सुरूवातीस पै.बनिया यांने एकेरी पट काढून पै.शेख याचेवर कब्जा घेतला. मात्र त्यातून शेखने सुटका करीत बगल डूब डाव करून पै.बनिया वर ताबा मिळविला. घेतलेल्या ताब्यातून पै.बनीयाने सुटका करून घेतली. या घडामोडीत प्रेक्षकांमध्ये उत्कंठा शिगेला गेली होती. दोन्ही पैलवान ताकदवान व चपळ होते. वेळ पाहत पै.शेखने पै.बनीयावर पकड मिळवीत एक चाक डावाने चितपट केले. डोळ्याचे पारणे फेडणारी लढत पाहुन कुस्ती शौकिनांनी आनंद व्यक्त केला.
या मैदानामध्ये प्रेक्षणीय झालेल्या लढतीमध्ये पै. महारुद्र काळेल याने पै.शुभम सिदनाळे वर विजय मिळविला. तर पै.दादा मुलाणी विरुद्ध पै.वैभव माने, पै. मामा तरंगे व पै.मनीष रायते या दोन लढती बरोबरीत सोडविण्यात आल्या. तर रोमांचकारी लढतीत पै.कालिचरण सोलनकर याने पै. आशिष वावरे वर आणि पै.नामदेव कोकाटे याने अमित सूळ वर विजय मिळवित आपले वर्चस्व सिद्ध केले.
दुसर्या क्रमांकाच्या लढतीत महाराष्ट्र चॅम्पियन पै. माऊली (हर्षद) कोकाटे याने महाराष्ट्र केसरी पै.हर्षद सदगीरला दुहेरी पट काढून चितपट केले व प्रेक्षकांची वाहवा मिळविली.
यावेळी माजी उपमुख्यमंत्री विजयसिंह मोहिते पाटी, हिंदकेसरी दीनानाथ सिंह, मल्ल सम्राट पै. रावसाहेब मगर, महाराष्ट्र केसरी शिवाजी पाचपुते, महाराष्ट्र केसरी बापू लोखंडे, महाराष्ट्र केसरी छोटा रावसाहेब मगर, अर्जुन पुरस्कार विजेते काका पवार, अस्लम काझी, पै. मंगलदास बांदल, कुस्ती कोच गणेश दांगट व विश्वास हरगुले, उत्तम फडतरे, प्रदीप जगदाळे, मयुसिंह पाटील, करणसिंह घोलप, ठाणे महानगरपालिकेचे उपायुक्त प्रीतम पाटील आदीसह राज्यभरातून आलेले मल्ल तसेच इंदापूर तालुक्यातील पदाधिकारी, कुस्ती शौकीन उपस्थित होते.
कुस्तीला प्रोत्साहन देणारे लोकनेते शहाजीराव पाटील यांचे पुण्यतिथी दिनी प्रत्येक वर्षी 25 फेब्रुवारीला शहाजी कुस्ती आखाडा भरविला जाईल असे हर्षवर्धन पाटील यांनी यावेळी बोलताना सांगितले.
माजी सहकार मंत्री हर्षवर्धन पाटील यांचे हस्ते पै. सिकंदर शेख यास मानाची गदा प्रदान करण्यात आली. प्रेक्षकांच्या गर्दीने शहाजी आखाडा खचाखच भरलेला होता. सर्वच कुस्त्या रंगतदार व अतिशय देखण्या झाल्या व आयोजकांचे कौतुक उपस्थित प्रेक्षकांनी भरभरून केले.
शहाजी कुस्ती आखाडा यशस्वीरित्या पार पाडणेसाठी संस्थापक हर्षवर्धन पाटील यांचे मार्गदर्शनाखाली अध्यक्ष लालासाहेब पवार, उपाध्यक्ष कांतीलाल झगडे, विलासराव वाघमोडे, उदयसिंह पाटील, राजवर्धन पाटील, अँड.कृष्णाजी यादव, दत्तात्रय शिर्के, दत्तू सवासे, प्रतापराव पाटील, हरिदास घोगरे, दादासो घोगरे, संजय बोडके, प्रकाश मोहिते, मच्छिंद्र वीर, बबनराव देवकर, भागवत गोरे, चंद्रकांत भोसले, कमाल जमादार, दत्तात्रय पोळ, कार्यकारी संचालक राम पाटील यांनी परिश्रम घेतले. तर कुस्ती आखाड्याचे नियोजन पै.कमाल जमादार, पै.पिंटू काळे, विलासराव वाघमोडे, पै.नितीन माने, पै.अमर जगदाळे, पै.राजेंद्र चोरमले आदींनी केले. कुस्तीचे निवेदन युवराज केचे, प्रशांत भागवत यांनी केले. तर सूत्रसंचालन रघुनाथ पन्हाळकर व अमर निलाखे यांनी केले