बारामती(वार्ताहर): नटराज करंडक 2022 चा मान मिलाप थिएटर्स, पुणे येथील लेखकाचा कुत्रा या एकांकिकेने सांघिक प्रथम क्रमांक पटकाविला. याबरोबर उत्कृष्ट दिग्दर्शन, सर्वोत्कृष्ट अभिनय पुरुष ही देखील पारितोषिके त्यांना मिळाली असल्याचे संस्थेचे अध्यक्ष किरण गुजर यांनी एका पत्रकाद्वारे कळविले आहे.
नटराज नाट्य कला मंडळ व अखिल भारतीय मराठी नाट्य परिषद बारामती शाखा यांच्या संयुक्त विद्यमाने खा.शरदचंद्रजी पवार यांच्या 82व्या वाढदिवसानिमित्त आयोजित 37 व्या राज्यस्तरीय मराठी एकांकिका स्पर्धा नटराज करंडक 2022 दि.17 व 18 डिसेंबर रोजी या एकांकिका नटराज नाट्य कला मंदिर, नटराज कला दालन येथे संपन्न झाल्या. यंदाचे नटराज करंडकचे 37 वे वर्ष होते. स्पर्धेमध्ये बारामती, पुणे, मुंबई, कल्याण, अलिबाग, ठाणे, फलटण, नाशिक, अंबरनाथ, सातारा आदी ठिकाणाहून एकूण 20 संघ सहभागी झाले होते.
द्वितीय क्रमांकाचे पारितोषिक कलादर्शन, पुणे या संस्थेच्या यशोदा या एकांकिकेने मिळविले तर तृतीय क्रमांकाचे पारितोषिक स्टोरीया प्रोडक्शन, कल्याण या संस्थेच्या ब्लाइंड स्पेस या एकांकिकेने पटकावले. याच बरोबर उत्तेजनार्थ सांघिक पारितोषिके अनुक्रमे अलिबाग येथील फ्रायडे फिल्म प्रोडक्शन संस्थेच्या नातीचरामी व बाराखडी नाट्य मंडळी सातारा या संस्थेच्या आर. ओ. के. या एकांकिकेने मिळविले.
यावर्षी नटराज करंडकचे प्रथम पारितोषिक हरिभाऊ देशपांडे चॅरिटेबल ट्रस्ट यांच्या वतीने प्रभाकर देशपांडे स्मृतिप्रीत्यर्थ देण्यात आले. वैयक्तिक पारितोषिके पुढील प्रमाणे – सर्वोत्कृष्ट अभिनय स्त्री भूमिका आई कलाकार श्वेता मोरे एकांकिका – ब्लाइंड स्पेस, सर्वोत्कृष्ट अभिनय पुरुष भूमिका गांधार कलाकार प्रणव जोशी एकांकिका – लेखकाचा कुत्रा, अभिनय उत्तेजनार्थ स्त्री भूमिका अनिका कलाकार ज्योती राऊळ एकांकिका- नातीचरामी, अभिनय उत्तेजनार्थ पुरुष भूमिका ड्यानी कलाकार आदित्य खेडेकर एकांकिका- टिनिट्स, सर्वोत्कृष्ट दिग्दर्शन मिलाप थिएटर्स यांनी सादर केलेल्या लेखकाचा कुत्रा या एकांकिकेसाठी प्रणव जोशी, सर्वोत्कृष्ट रंगभूषा वेशभूषा कलादर्शन, पुणे यांनी सादर केलेल्या यशोदा या एकांकिकेला मिळाले, सर्वोत्कृष्ट प्रकाश योजना यशोदा या एकांकिकेसाठी अभिप्राय कामठे यांना मिळाले. सर्वोत्कृष्ट नेपथ्य यशोदा या एकांकिकेसाठी ऋतुजा बोठे. सर्वोत्कृष्ट पार्श्वसंगीत यशोदा या एकांकिकेसाठी प्रशिक कांबळे. तर सर्वोत्कृष्ट नवीन लेखन नातीचरामी या एकांकिकेसाठी चैताली गानु- ओक यांना मिळाले.
बक्षीस समारंभास संस्थेचे सर्व सभासद व परीक्षक उपस्थित होते. स्पर्धेचे परीक्षक म्हणून ज्येष्ठ नाट्य कलाकार लक्ष्मण जगताप व प्रदीप परकाळे यांनी काम पाहिले. एकांकिका पाहण्याकरिता बारामतीतील नाट्यरसिकांनी चांगलीच गर्दी केली होती.
एकांकिका स्पर्धा यशस्वी होण्याकरिता प्रशांत काटे, श्रीकांत गालिंदे, सचिन आगवणे, दीपक मुळे, मल्लिकार्जुन हिरेमठ, विनय आगवणे, प्रतीक घोडके, अमोद देव, सचिन होळकर, ड. अमर महाडिक आदींनी परिश्रम घेतले.