बारामती(ऑनलाईन वतन की लकीर): वाईन प्रमाणेच गुळापासून बनवलेल्या गावठी हातभट्टीची वाईन व मोहाच्या फुलांची वाईन विक्रीसाठी मॉल व किराणा दुकानांमध्ये परवानगी मिळणेबाबतचे पत्र विधान परिषदेचे आमदार सदाभाऊ खोत यांनी दि.3 फेब्रुवारी 2022 रोजी राज्याचे मुख्यमंत्री उद्धव ठाकरे यांना लेखी पत्राद्वारे कळविले आहे.
आपल्या महाविकास आघाडी सरकारने किराणा दुकानामध्ये आणि मॉलमध्ये वाईन विक्रीचा जो निर्णय घेतला आहे, त्याचा महाराष्ट्र द्राक्ष उत्पादक शेतकरी मोठ्या आनंदाने स्वागत करत आहे. आपल्या या निर्णयामुळे द्राक्ष उत्पादकांना सोन्याचे दिवस येणार आहेत. त्यामुळे द्राक्ष उत्पादकांनी आपल्या घरावर या निर्णयामुळे गुढी उभा करून स्वागत केले आहे.
वाईन विक्रीचा निर्णय घेतल्यानंतर राज्यातील गुळ उत्पादक शेतकर्‍यांच्या आशा पल्लवीत झाल्या आहेत. गुळ व्यवसाय हा सध्या मोठ्या अडचणीतून जात आहे. अनेक गुन्हाळघरे बंद पडलेली आहेत. ही गुन्हर्‍हाळघरे जर नव्याने पूर्वीसारखी चालवायची असतील तर गुळापासून गावठी हातभट्टी वाईन बनवायला परवानगी देण्यात यावी. सदर वाईन ही कमी खर्चात तयार करता येईल. गुळाची वाईन तयार करायचे कारखाने गावागावांमध्ये उभे करता येतील. यातुन रोजगार तर वाढेलच पण ऊस उत्पादकांना सोन्याचे दिवस येतील. तसेच आदिवासी शेतकर्‍यांनाही आपणांस न्याय द्यावा लागेल. मोहाच्या फुलांची वाईन बनवून त्या वाईनच्या विक्रीला देखील परवानगी द्यावी, कारण सध्या आपण शेतकर्‍यांच्या हिताचे निर्णय घेत आहात.
म्हणूनच छोट्या-मोठ्या मद्यनिर्मिती करणार्‍या ग्रामीण भागातील पारंपारिक मद्य निर्मात्यांना आर्थिक बळकटी मिळावा, यासाठी द्राक्षाच्या उत्पादकांप्रमाणेच राज्यातील ऊस उत्पादक शेतकर्‍यांना देखील आपण दिलासा द्यावा, अशी महाविकास आघाडीकडुन अपेक्षा खोत यांनी व्यक्त केली आहे.