अशोक घोडके यांजकडून…
इंदापूर(वार्ताहर): ज्या तालुक्यातून नॅशनल हायवे गेलेला असतो तेथील पोलीसांना सतर्क व दक्ष राहुन करड्या नजरेने प्रत्येक गोष्टीवर लक्ष द्यावे लागते. तसाच प्रकार समोर आला आणि इंदापूर पोलीस स्टेशनचे पोलीस निरीक्षक टी.वाय.मुजावर व सहकार्यांच्या सतर्कता व करड्या नजरेमुळे 22 लाख 27 हजार 500 रूपयांचा गुटखा भरून निघालेला कंटेनर इंदापूर पोलीसांच्या दक्षतेमुळे ताब्यात आला. एका महिन्यात दुसर्‍यांदा अवैद्य गुटख्यावर मोठी कारवाई करण्यात पोलीसांना यश आले.
याबाबत सविस्तर माहिती अशी की, दि 9 जानेवारी 2022 रोजी इंदापूर शहरानजीक असलेल्या पायल सर्कल जवळ आयशर कंपनीचा कंटेनर व ऊसाने भरलेला ट्रॅक्टर यांचा अपघात झाला होता. या अपघाता वेळी आयशर कंपनीच्या कंटेनरचा चालक हनीफ सय्यद (रा.बेंगलोर) हा रस्त्याने वाहन चालवताना सर्व नियमांकडे दुर्लक्ष करून वेगाने चालवत होता. वेगाने चालवलेल्या कंटेनरने उसाने भरलेल्या ट्रॉलीला पाठीमाघून जोरदार धडक दिली होती. यामध्ये कंटेनर चालक किरकोळ जखमी झाला असतानाही गंभीर जखमी झाले आहे असा बनाव करून पुढील उपचारासाठी पुणे येथे दाखल झाला होता.
परंतु दोन ते तीन दिवस सदर कंटेनरकडे कोणीही न फिरकल्याने इंदापूर पोलिसांना वाहनात असलेल्या माला विषयी संशय आल्याने कंटेनरचे पाठीमागील सील तोडून पाहिले असता यामध्ये 22 लाख 27 हजार 500 रुपये किंमतचा अवैधरीत्या गुटखा आढळून आला असून महाराष्ट्र शासनाने प्रतिबंध केलेला व मानवी आरोग्यास अपायकारक असलेला गुटखा वाहतूक केल्याप्रकरणी गुन्हा दाखल करण्यात आला आहे.
सदर कारवाई मध्ये कंटेनर (केए-01,एएफ 3396) मध्ये 22 लाख 27 हजार 500 रुपये किमतीच्या गुटख्याची प्लास्टिकची व 6 पिशव्या तसेच प्रत्येक पिशवीत 55 पॅकबंद पुढे आढळले असून यामध्ये आर के प्रीमियम कंपनीच्या गुटख्याच्या 75 पुड्या सापडल्या आहेत. तसेच कंटेनरची एकूण किंमत 25 लाख रुपये असून एकूण 47 लाख 27 हजार 500 रुपये किंमतीचा ऐवज जप्त करण्यात आला आहे.
सदर कारवाई पोलीस अधीक्षक डॉ.अभिनव देशमुख, अप्पर पोलीस अधीक्षक मिलिंद मोहीते, उपविभागीय पोलिस अधिकारी गणेश इंगळे व पोलीस निरीक्षक टि.वाय. मुजावर यांच्या मार्गदर्शनाखाली करण्यात आली. पुढील तपास सहाय्यक पोलीस निरीक्षक माने करत आहेत.
सदर कारवाईमध्ये सहाय्यक पोलीस निरीक्षक धनवे, सहाय्यक पोलीस निरीक्षक पाटील, पोलीस उपनिरीक्षक देठे, पोलीस उपनिरीक्षक लिगाडे, पोलीस उपनिरीक्षक पाडुळे, पोलीस उपनिरीक्षक जाधव, पो.ना.मनोज गायकवाड, पो.ना. साळवे, पो.ना. सलमान खान, पो.ह. बालगुडे, पो.ना.ज्ञानेश्वर जाधव, पो.शि. नरळे, पो.शि.केसकर, पो.ना.मल्हारे, पो.शि.चौधर, पो.ना.अरणे, पो.शि.शिंगाडे, महिला पो.ह.खंडागळे यांनी सहभाग घेतला होता.
पोलीस निरीक्षक टी वाय मुजावर, इंदापूर तालुक्यातील अवैध धंदे करणार्‍यांची गेली पावर
इंदापूर पोलीस स्टेशनचा पदभार स्विकारलेपासून अवैध धंदे करणार्‍यांच्या हृदयात पोलीस निरीक्षक टी.वाय.मुजावर यांची धडकी भरलेली आहे. त्यांच्या करडी नजरेमुळे अवैध धंदे करणारे धंदा करू का नको या दबावामध्ये आहे. मुजावर यांनी अनेक मोठ्या कारवाया केल्या आहेत. अवैद्य धंदे व अवैद्य मालाची वाहतूक करणार्‍यांचे कंबरडेच मोडले आहे. तसेच तब्बल एक ते दीड महिन्याच्या अंतरात अवैद्य गुटख्यावर ती दोन मोठ्या कारवाया करण्यात आल्या असून लाखो रुपयांचा माल जप्त करण्यात आला आहे. त्यामुळे स्थानिक नागरीक म्हणतात पोलीस निरीक्षक टी.वाय.मुजावर, इंदापूर तालुक्यातील अवैध धंदे करणार्‍यांची गेली बरं का पावर.