बारामती(वार्ताहर): बारामतीचा सुपुत्र अभिषेक सतीश ननवरे याने दक्षिण आफ्रिका येथे संपन्न झालेली आयर्नमॅन स्पर्धा पूर्ण करत एका नवीन विक्रमाची नोंद केली आहे.
ग्रामीण भारतातील सर्वाधिक कमी वयाचा आयर्नमॅन होण्याचा विक्रम अभिषेकने केला आहे. आयर्नमॅन होण्यासाठी निर्धारित केलेल्या वेळेपेक्षा कमी वेळेत ही स्पर्धा पूर्ण करत आयर्नमॅन हा जगविख्यात मानला जाणारा मानाचा किताब मिळविला आहे.
’आरोग्य हीच खरी संपत्ती’ हा मंत्र सर्वदूर पोहचविण्याच्या उद्देशाने तीनदा आयर्नमॅन झालेले सतीश ननवरे हे अभिषेकचे वडील आहेत. आपल्या पित्याकडून प्रेरणा घेत त्यांचेच मार्गदर्शन तसेच माझी आई, सर्व शुभचिंतक, बारामती स्पोर्ट्स फाऊंडेशनचे सर्व सदस्य, नियमित व्यायाम करणार्‍या माझ्या सर्व मित्रांचे प्रेम आणि शुभेच्छांमुळे ही किमया साकार केल्याचे अभिषेकने सांगितले.
आयर्नमॅन होण्यासाठी 3.8 कि.मी. पोहणे, 180 कि.मी. सायकलिंग आणि 42.2 कि.मी. धावणे हे आव्हान पूर्ण करावे लागते. त्याठिकाणी अत्यंत प्रतिकूल नैसर्गिक वातावरण असतांनाही या खडतर परिस्थितीवर मात करीत अभिषेकने हे आव्हान 13 तास 33 मिनिटे 14 सेकंदात पूर्ण केले.