अशोक घोडके यांजकडून…
इंदापूर(वार्ताहर): सहवीज निर्मिती प्रकल्पातून 4 कोटी 50 लाख युनिट वीज एक्सपोर्टचे उद्दिष्ठ ठेवून कामगारांना 8.33 टक्के बोनस देणार असल्याचे नीरा-भीमा सहकारी साखर कारखान्याचे संस्थापक व माजी मंत्री हर्षवर्धन पाटील यांनी जाहीर केले.
शनिवारी (दि.23) शहाजीनगर येथे नीरा भीमा सहकारी साखर कारखान्याची संचालक मंडळाची ऊस दरासंदर्भात बैठक हर्षवर्धन पाटील यांच्या उपस्थितीत झाली. यावेळी कारखान्याचे अध्यक्ष लालासाहेब पवार, उपाध्यक्ष कांतिलाल झगडे, विलासराव वाघमोडे, उदयसिंह पाटील, राजवर्धन पाटील, कृष्णाजी यादव, दत्तात्रय शिर्के, दत्तू सवासे, प्रतापराव पाटील, हरिदास घोगरे, दादासो घोगरे, संजय बोडके, प्रकाश मोहिते, मच्छिंद्र वीर, बबनराव देवकर, भागवत गोरे, चंद्रकांत भोसले, सुभाष पोळ, कमाल जामदार, कार्यकारी संचालक डी.एन.मरकड उपस्थित होते.
पुढे बोलताना पाटील म्हणाले की, सन 2021-22 या गळीत हंगामामध्ये गाळपास येणार्‍या ऊसाला प्रति टन रु.2500 प्लस दर देण्यात येईल. चालु हंगामात कारखाना 7 लाख मे. टन ऊसाचे गाळप करणार आहे. तर इथेनॉलचे 1 कोटी 50 लाख लि., सेंद्रिय बॅग 2 लाख निर्मिती, 15 लाख घनमीटर बायोगॅस निर्मितीचे आणि सहवीज निर्मिती प्रकल्पातून 4 कोटी 50 लाख युनिट वीज एक्सपोर्टचे उद्दिष्ट ठेवण्यात आले आहे, असे हर्षवर्धन पाटील यांनी सांगितले. तसेच कारखान्यांकडून ऊस उत्पादक शेतकर्‍यांना ऊस बिलाची देय रक्कम रु.119 प्रमाणे दिवाळीपूर्वी बँक खात्यात वर्ग केली जाईल असेही हर्षवर्धन पाटील व अध्यक्ष लालासाहेब पवार यांनी सांगितले.