बारामती(प्रतिनिधी): दरवर्षी प्रमाणे पारंपारीक शिवजन्मोत्सव सोहळा 2025चे आयोजन छत्रपती जन्मोत्सव समिती बारामती यांच्या मार्फत करण्यात आले आहे. यामध्ये चित्रकला स्पर्धा, शिवचरित्र नृत्यमहोत्सव, शिवगीतांचा कार्यक्रम, महाराष्ट्राचा मराठी बाणा व शस्त्र व पुस्तक प्रदर्शन अशा विविध विधायक कार्यक्रमाचे आयोजन करण्यात आले आहे.
13 ते 16 मार्च दरम्यान नटराज नाट्य कला मंदिर कलादालनामध्ये शिवकालीन शस्त्रांचे, शिवछत्रपतींच्या आरमारातील युद्धनौका व शिवकालीन नाण्यांचे प्रदर्शन ठेवले आहे. यासोबत याठिकाणी ऐतिहासिक ग्रंथ व पुस्तकांचे प्रदर्शन व माफक दरात विक्री देखील करण्यात येणार आहे.
13 मार्च 2025 रोजी शिव चरित्रातील निवडक प्रसंगांवर आधारित शिवनृत्याविष्कार हा कार्यक्रम आयोजित केला असून या कार्यक्रमादरम्यान छत्रपती जन्मोत्सव समिती मार्फत घेतल्या गेलेल्या चित्रकला स्पर्धेचा बक्षीस समारंभ होणार आहे.
14 मार्च 2025 रोजी ह.भ.प. अवधूतजी गांधी यांचा छत्रपती शिवाजी महाराज यांच्यावरील गीतांचा कार्यक्रम होणार आहे.
15 मार्च 2025 रोजी शिवशाहीर चंद्रकांत माने यांचा महाराष्ट्राचा मराठी बाणा या कार्यक्रमाचे आयोजन करण्यात आले आहे.
वरील तीनही कार्यक्रमा नटराज नाट्य कला मंदिराच्या सभागृहामध्ये संध्याकाळी सहा ते नऊ या दरम्यान होणार आहेत.
17 मार्च 2025 रोजी तिथीनुसार शिवजयंती निमित्त शिवछत्रपतींच्या पारंपारिक पालखीचे आयोजन करण्यात आले असून सदर पालखीचे प्रस्थान सकाळी नऊ वाजता छत्रपती शिवाजी महाराज उद्यान कसबा येथून होऊन इंदापूर चौक, गांधी चौक मार्गे समारोप भिगवण चौकातील गणेश मंदिरा नजीक होणार आहे.
सदर पालखीमध्ये स्वराज्याचे रणमर्द शीलेदार, स्वराज्याचे गुप्तहेर, पारंपारिक वेशातील बारामतीकर तसेच पारंपारिक वाद्य ढोल पथक, झांज पथक, हलगी पथक, वारकरी पथक, गजी नृत्य पथक सहभागी होणार आहेत.
तरी तमाम बारामतीकर व शिवप्रेमींनी पारंपारिक पद्धतीने काढल्या जाणाऱ्या शिवप्रभूंच्या पालखीस तसेच विविध कार्यक्रमांसाठी उपस्थित रहावे असे नम्र आवाहन छत्रपती जन्मोत्सव समिती बारामती मार्फत करण्यात आले आहे.