शरयू फाउंडेशन आयोजित बारामती हाफ मॅरेथॉन 2024 ला उत्स्फूर्त प्रतिसाद
बारामती(प्रतिनिधी): यश प्राप्त करावयाचे असेल तर सरावा शिवाय पर्याय नाही. ध्येय निश्चित करा, ध्येयापर्यंत पोहोचेपर्यंत इतर प्रलोभन, आमिषाला बळी पडू नका असा सल्ला सुप्रसिद्ध भारतीय महिला बॉक्सर मेरी कोम यांनी दिला.
बारामती येथे रविवार दि.11 फेब्रुवारी रोजी शरयू फाउंडेशन यांच्यावतीने बारामती हाफ मॅरेथॉन 2024 या स्पर्धेचे आयोजन करण्यात आले होते. याप्रसंगी प्रमुख उपस्थितीमध्ये मेरी कोम सर्व खेळाडूंना मार्गदर्शन करताना बोलत होत्या.
यावेळी शरयू फाउंडेशनचे अध्यक्षा शर्मिला पवार, उद्योजक श्रीनिवास पवार, मेरी कोम यांच्या हस्ते पहाटे 6 वाजता झेंडा दाखवून मॅरेथॉनला सुरूवात करण्यात आली.
बक्षीस वितरण प्रसंगी उपविभागीय अधिकारी वैभव नावडकर, अतिरिक्त पोलीस अधीक्षक संजय जाधव, उपप्रादेशिक परिवहन अधिकारी दीपक केसरकर, उपविभागीय पोलीस अधिकारी सुदर्शन राठोड, पोलीस निरीक्षक दिनेश तायडे गोरख गायकवाड, बारामती रनर्स ग्रुपचे डॉ.वरद देवकाते, अमोल वाबळे, ऍड.रोहित काटे इ. मान्यवर उपस्थित होते.
मेरी कोम पुढे म्हणाल्या की, कठीण परिस्थितीमध्ये संघर्ष करत, जिद्द चिकाटी आत्मविश्वास या जोरावर आपण यश मिळवू शकतो व ते यश मी मिळवले. 4 अपत्ये असताना सुद्धा सराव कधीही चुकला नाही संसाराची जवाबदारी पार पाडताना पतीचे सहकार्य मिळाले. ऑलम्पिकमध्ये सुवर्णपदक मिळवायचे होते परंतु ब्रांच पदकावर समाधान मानावे लागले ही सुद्धा खंत त्यांनी व्यक्त केली.
ग्रामीण भागातील खेळाडूंना हक्काचे व्यासपीठ व मैदान प्राप्त करून देणे त्याचप्रमाणे आरोग्याचा जनजागर होण्यासाठी सदर मॅरेथॉनच्या माध्यमातून प्रत्यन करत असल्याचे फाउंडेशनच्या अध्यक्षा शर्मिला पवार यांनी सांगितले.
शरयु फौंडेशनच्या कार्याचा आढावा ऍड.शुभम निंबाळकर यांनी घेतला.
या स्पर्धेत जवळपास 6 हजार स्पर्धकांनी सहभाग घेऊन स्पर्धा पूर्ण केली. प्रत्येक सहभागी खेळाडूंना पदक देऊन सन्मानित करण्यात आले. सहभागी खेळाडू, प्रशिक्षक, व सर्वांनी उत्कृष्ट अयोजनाबद्दल समाधान व्यक्त केले. खेळाडूच्या मुलाखती अनिल सावळेपाटील यांनी घेतल्या. सूत्रसंचालन अनिल रुपनवर व अनिल साळवेपाटील यांनी केले शेवटी आभार बारामती रर्नस ग्रुपचे डॉ.पी.एन देवकाते यांनी मानले.
बारामतीच्या खासदार धावल्या….
बारामतीच्या लोकप्रिय खासदार सौ.सुप्रिया सुळे यांनी रीतसर नोंदणी करून स्वतः 3 किमी धावून सहभाग घेतला व उपस्थीतांना प्रोत्साहित केले.
आफ्रिकन खेळाडू पेक्षा भारतीय खेळाडूंनी या वेळेस बाजी मारली तर हरियाणा मधील 65 वर्षीय भजनलाल व त्यांचा मुलगा 32 वर्षीय हरभजन या पिता पुत्राच्या जोडीने स्पर्धा पूर्ण करत केलेले भांगडा नृत्य ने डोळ्यांचे पारणे फेडले तर नऊवारी साडी घालून महिलांनी भाग घेतला बालकांपासून ज्येष्ठापर्यंत प्रत्येक स्त्री पुरुषाचा सहभाग आनंददायी व उल्हासपूर्ण होता.
मी पुन्हा येईन ….
मला बारामती आवडली येथील वातावरण, पर्यावरण व स्पर्धेचे नियोजन आवडले मला परत बोलावले तर मी पुन्हा येईन असे वक्तव्य मेरी कोम यांनी केले.
दरवर्षीप्रमाणे याही वर्षी या मॅरेथॉन स्पर्धा यशस्वी होण्यासाठी बारामती रनर्स ग्रुपचे खुप मोठे मोलाचे सहकार्य लाभले.