बारामती(वार्ताहर): मळद गावात सतत लूटमर करणार्या रेकॉर्डवरील गुन्हेगार भोर्या बापूराव जाधव यास अटक करून मे.कोर्टासमोर हजर केले असता चार दिवस पोलीस ठोकडी देण्यात आली.
याबाबत सविस्तर माहिती की, 22 एप्रिल 2022 रोजी प्रदीप बाळू गायकवाड (वय-26, रा.भैय्यावस्ती मळद) हे दिवसभर एमआयडीसीत काम करून मोटरसायकलवर आपल्या घरी जात असताना, मळदचे सुरज रवींद्र मदने व बबन अहिवळे यांनी त्याला मोटरसायकल आडवी लावून बळजबरीने दारू पिण्यासाठी पैसे मागितले. त्याने ते देण्यास नकार दिला असता त्या दोघांनी त्याला फायटरने मारहाण केली. पुन्हा मळद ग्रामपंचायतीसमोर अडवून मळद गावातील गुंड भोर्या बापूराव जाधव व अमोल रवींद्र मदने हे सुद्धा त्या दोघांना येऊन मिळाले व त्या सर्वांनी त्याला परत मारहाण करून त्याच्या खिशातील बाराशे रुपये काढून घेतले व त्याला दमदाटी केली.
याटोळी बद्दल यापूर्वीसुद्धा खूप लहान मोठ्या तक्रारी पोलिस ठाण्यात नाव न सांगण्याचे अटीवर पोलिसात येत असतात त्यामुळे त्यांचेवर तात्काळ गुन्हा दाखल करून रेकॉर्डवरील गुन्हेगार भोर्या जाधव याला तात्काळ अटक केली बाकीचे आरोपी त्याला अटक होताच परागंदा झाली.
या आरोपींवर नजीकच्या काळात प्रतिबंधक कारवाई होणार आहे. त्यांच्याविरुद्ध छोट्या-मोठ्या तक्रारी असतील त्या निर्भीडपणे लोकांनी पोलीस स्टेशनला द्याव्यात.
सदरची कारवाई बारामती शहर पोलीस स्टेशनचे पोलीस निरीक्षक सुनील महाडिक, सहाय्यक पोलीस निरीक्षक प्रकाश वाघमारे, पोलीस उपनिरीक्षक गणेश पाटील, पोलीस कर्मचारी दळवी, सहाय्यक पोलीस फौजदार संजय जगदाळे, दशरथ कोळेकर यांनी केलेली आहे.