बारामती(वार्ताहर): मी कोणाच्या खांद्यावर बसतो त्यापेक्षा आपण कुठल्या कडेवर आहात, आपण आहात त्याच ठिकाणी राहिलात तरी लोकांचा विश्र्वास नक्कल वाढेल अशी खरमरीत उत्तर कर्जत-जामखेडचे आमदार रोहित पवार यांनी दिले.
शरद पवारांच्या खांद्यावरुन खाली उतरा असे भाजपाचे आमदार गोपीचंद पडळकर यांनी रोहित पवार यांच्यावर टिका केली. ते पुढे असेही म्हणाले की, माजी मुख्यमंत्री देवेंद्र फडणवीस आणि भारताचे पंतप्रधान नरेंद्र मोदी यांना फुकटचे सल्ले देऊ नका. यावर त्यांनी चांगलाच समाचार घेतला.
गोपीचंद पडळकर यांनी रस्त्याच्या दुरावस्थेबाबत पाठविलेल्या व्हिडिओचे आ.पवार यांनी स्वागत केले. ते म्हणाले या मतदार संघात गेली पंचवीस वर्षे आपल्याच पक्षाचे आमदार होते. त्यामुळे पंचवीस वर्षांचा बॅकलॉग मोठा आहे. आमदार होऊन अजुन एकही वर्ष झाले नाही. विकासाचा मोठा बॅकलॉग भरुन काढण्यासाठी काम करतोय आणि कोरोना नसता तर मतदारसंघातील बरेचसे प्रश्न मार्गीही लावले असते. या मतदार संघात कोणाची सत्ता होती वजनदार मंत्री, जिल्ह्याचे पालकमंत्री होती तरी दुरावस्था आहे. याचा जाब खरं तर तुम्ही त्यांना विचारायला पाहिजे होता पण आपण मोठे नेते आहात त्यामुळे त्यांना जाब विचारणार नाहीत.
श्री.पवार म्हणाले, मी या मतदारसंघाची निवड का केली. या मतदारसंघाची अशी दुरवस्था असल्याने इथे काम करण्यासाठी खूप वाव आहे. हे मी वेळोवेळी सांगत आलेलो आहे. आपण मिरजगावमधील खराब रस्ता आज दाखवला, यात नवीन काहीच नाही आणि अशा खराब रस्त्यांना कंटाळूनच ते दुरुस्त करण्याची जबाबदारी या मतदारसंघातील लोकांनी विश्वासाने माझ्यावर टाकली आणि मी ती पूर्ण करणारच. मी हवेतून पाणी काढणारा किंवा वाघाच्या जबड्यात हात घालणारा नेता नाही तर जमिनीवर उतरून काम करणारा, लोकांचा विकास करण्याची शपथ घेऊन ती पाळणारा कार्यकर्ता आहे. त्यामुळं माझ्या मतदारसंघाची चिंता आपण करू नका असेही ते म्हणाले.