बारामती(वार्ताहर):
शृंखला पायी असू दे मी गतीचे गीत गाई दु:ख उधळायास आता आसवांना वेळ नाही
ह्या बाबा आमटे लिखित काव्यपंक्तीचा उल्लेख करीत डॉ. सीमा नाईक-गोसावी म्हणाल्या सध्या कोरोना संसर्गजन्य परिस्थितीला, आपण सामोरे जात आहोत, जागतिक महामारीचे संकट ओढवले असले तरी आपण परिस्थितीवर मात करीत ऑनलाईन का होईना सणवार साजरे करून त्यामधून संदेश देण्याचा प्रयत्न करीत आहोत, ही खरोखरीच उल्लेखनीय बाब आहे.
निमित्त होते बारामती येथील रागिणी फाऊंडेशन आयोजित ऑनलाईन गौरीआरास स्पर्धेचे! कोरोनासंसर्गजन्य काळातही महिलांना सणवार उत्स्फूर्तपणे साजरे करता यावेत, पारंपारिकतेबरोबरच महिलांच्या कलाकौशल्यातूनही जनजागृतीपर संदेश देता यावा, या अनुषंगाने या कार्यक्रमाची निर्मिती रागिणी फाऊंडेशनच्या संचालिका राजश्री आगम यांच्या संकल्पनेतून करण्यात आली.यामध्ये महिलांनी ’कोरोना ’ या विषयावर आधारित गौरी आरास करणे गरजेचे होते. या मध्ये महिलांनी कोरोना काळातील वैद्यकीय सेवा, डॉक्टर, आरोग्य कर्मचारी,पोलीस, ऑनलाईन शिक्षणप्रणालीचा होत असलेला अवलंब यावर भाष्य करणारी गौरी आरास केली होती,या आरास मधून मास्क वापरासंबंधीचे संदेश ,कोरोनावर मात करण्यासाठी घ्यावयाची खबरदारी,कोरोना पासून बचाव होण्यासाठी घ्यावयाची दक्षता,प्रतिकारशक्ती वाढवण्यासाठी घरगुती काढ्यांचे महत्व अश्या वैविध्यपूर्ण गोष्टींचा समावेश करून गौरी आरास मधून जनजागृती करण्याचा आगळा-वेगळा प्रयत्न महिलांनी केला होता.
या स्पर्धेमध्ये महिलांनी गौरीआरास केलेले व्हिडीओ रागिणी फाऊंडेशनकडे पाठवायचे होते. या व्हिडीओला व्ह्यूज, सादरीकरण,संदेश,मांडणी,एकूण प्रभाव, लाईक या घटकांच्या सहाय्याने परीक्षकांकडून गुणांकन करण्यात आले.
स्पर्धेत प्रथम क्रमांक – सौ.दीपाली मिलन साळुंखे (जराडवाडी), द्वितीय डॉ. हिमगौरी वडगावकर(बारामती), तृतीय – सौ.शुभांगी पवार (माळेगाव), उत्तेजनार्थ-सौ.सुषमा नांदे (सोमेश्वर), कु.अमृता तंटक यांनी मिळवले.
या स्पर्धेचे परीक्षण प्रा.डॉ.सीमा नाईक-गोसावी व ज्येष्ठ शिक्षिका रेखा आळंदकर यांनी केले. या स्पर्धेसाठी बारामती, सातारा, इंदापूर, भोर, पंढरपूर, बीड, वाळवा, पुरंदर, धायरी या परिसरातून महिलांनी सहभाग दर्शवला होता.
या स्पर्धेचा बक्षीसवितारण समारंभ सौभाग्य होलसेल साडी डेपो येथे पार पडला. या उपक्रमासाठी सौभाग्य होलसेल साडी डेपोचे संचालक राहुल चव्हाण, संतोष बांदल, अनिल कोकरे, विवेक भोसले, अस्मिता कोकरे, कोमल बांदल उपस्थित होते. तर या कार्यक्रमाच्या यशस्वितेसाठी महालक्ष्मी ट्रेडिंगचे नितीन पारेख तसेच प्रकाश शिंदे, ऋतुजा आगम, ऍड.वीणा फडतरे, मयूर साळुंखे, पूजा बोराटे यांचे सहकार्य लाभले. या कार्यक्रमाचे सूत्रसंचालन अनिल सावळे पाटील यांनी केले.