बारामती(वार्ताहर): प्रेम,सहकार्य आणि बंधुभाव हीच प्रभू येशूची खरी शिकवण असुन त्याची आजच्या काळात नितांत आवश्यकता असल्याचे प्रतिपादन बारामती नगरपरिषदेच्या अध्यक्षा सौ.पौर्णिमा तावरे यांनी केले.
देव प्रीती आहे हे प्रत्यक्ष कृतीतून दाखविणारी संस्था म्हणजेच चर्च ऑफ ख्राईस्ट पुनर्स्थापित,बारामतीच्या वतीने नाताळ सणानिमित्त आयोजित कार्यक्रमाप्रसंगी सौ.तावरे बोलत होत्या. चर्चच्या कार्याची दखल घेत त्यांनी विशेष कौतुक केले.
यावेळी राष्ट्रवादी कॉंग्रेस पक्षाचे शहर अध्यक्ष इम्तियाज शिकीलकर, नगरसेवक अमर धुमाळ, मुस्लिम बँकेचे संचालक आलताफ सय्यद, आदित्य हिंगणे इ.मान्यवर उपस्थित होते.
चर्चच्या माध्यमातून गेली 115 वर्षापासून विधायक उपक्रम राबविण्यात येतात. यामध्ये समाजातील गरजू व्यक्तींसाठी अन्नदानाचे पवित्र कार्य, तर लहान मुलांना प्रेरणा मिळावी, त्यांच्यामध्ये आत्मविश्वास आणि जिद्द निर्माण व्हावी यासाठी त्यांना विविध बक्षिसे देऊन गौरविण्यात आले. नाताळ सण खूप वेगळ्या पद्धतीने साजरा केल्याबद्दल उपस्थित सर्व मान्यवरांनी चर्च च्या कार्याचे विशेष कौतुक केले.
यावेळी डॉ. सौरभ मुथा यांची बारामती बँकेच्या संचालक पदी निवड झालेबद्दल चर्च च्या वतीने त्यांचा सन्मान करण्यात आला.
याप्रसंगी तर चर्च च्या वतीने अध्यक्ष सुनिल गोरे, सचिव वैभव वसंत पारधे, खजिनदार अनोश सांगळे,कार्याध्यक्ष नितीन पारकर, पास्टर अनोष खावडिया, पास्टर हेमलता गायकवाड, पास्टर सुनंदा गोरे व रावसाहेब चक्रनारायण व इतर पदाधिकारी उपस्थित होते. तसेच समाजातील ख्रिस्ती बंधू-भगिनी मोठ्या संख्येने उपस्थित होते.
संपूर्ण कार्यक्रमासाठी ख्रिस्ती युवक संघटनेचे विशेष सहकार्य लाभले.