बारामती(वार्ताहर): बारामती येथील राधेश्याम एन. आगरवाल टेक्निकल विद्यालय व ज्युनइर कॉलेज बारामतीचे प्राचार्य राजेंद्र काकडे यांचा सपत्निक सत्कार करून सेवानिवृत्तीचा निरोप समारंभ उत्साहात साजरा करण्यात आला. दि.1 सप्टेंबरपासून नवनियुक्त जाकीर गुलामअली शेख यांनी प्राचार्य पदाची धुरा स्विकारली आहे.
या निरोप सेवानिवृत्त समारंभाच्या अध्यक्षस्थानी गुरुकुल समन्वयक व विद्यालयाचे माजी प्राचार्य दिलीप घाडगे उपस्थित होते.
श्री.काकडे यांनी 33 वर्ष सेवा केली. 1 सप्टेंबर 1988 रोजी कन्या शाळा नीरा या ठिकाणी आपल्या सेवेची सुरुवात केली होती. 1 फेब्रुवारी 2018 पासून टेक्निकल विद्यालयात प्राचार्य म्हणून रुजू झाले. तेव्हापासून विद्यालयात विविध उपक्रम राबवून शाळा गुणवत्ता पूर्ण करण्याचा प्रयत्न केला. विद्यालयात आलेपासून सर्वांच्या सहकार्याने माजी विद्यार्थी मेळावे, माजी सेवक मेळावे घेऊन शाळा गुणवत्ता वाढीसाठी व भौतिक सोयी-सुविधा वाढीसाठी प्रयत्न केले. त्यांनी 5वी,8वी शिष्यवृत्ती, रयत प्रज्ञा शोध परीक्षा, एन.टी.एस परीक्षा, एन.एम.एम.एस परीक्षा अशा सर्व प्रकारच्या स्पर्धा परिक्षेवर विशेष भर देऊन विद्यार्थ्यांची स्पर्धा परिक्षेविषयी आवड निर्माण करण्याचे प्रयत्न केले. संस्थेच्या शताब्दी महोत्सवच्या निमित्ताने खेळाडू आपल्या भेटीला, कवी आपल्या भेटीला, साहित्यिक आपल्या भेटीला, अधिकारी आपल्या भेटीला असे विविध कल्पक उपक्रम राबवल्याने संस्थेचा उपक्रमशील शाळा हा पुरस्कार विद्यालयाला मिळाला.
कोव्हिड-19 च्या पार्श्वभूमीवर बदलत्या काळाबरोबर सर्व शिक्षकांनी आपल्या विद्यार्थाना ऑनलाईन अध्यापन करण्यासाठी विशेष अशा प्रशिक्षणची व्यवस्था त्यांनी केली. त्यायोगे सर्व शिक्षक आज बदलत्या तंत्रज्ञानाचा चांगल्या प्रकारे उपयोग करत आहेत. शिक्षकामधील विशेष गुण ओळखून त्यांना प्रोत्साहन देण्याचे काम त्यांनी केले.विद्यालयातील महिला शिक्षकांसाठी महिला दिन, बालिका दिन, आरोग्य शिबीर असे विविध उपक्रम सरांनी राबवले.फक्त गुणवत्ताच न वाढवता विद्यार्थामध्ये खेळाची आवड निर्माण होण्यासाठी सरांनी प्रयत्न केले. म्हणून विविध खेळांमध्ये विद्यार्थानी यश संपादन केले. अशा या उत्तुंग कामगिरी करणार्या प्रचार्याचा आदर्श मुख्याध्यापक म्हणून सन्मान करण्यात आलेला आहे.
या सेवानिवृत्ती निरोप समारंभात शशिकांत फडतरे, विकास जाधव ,सौ.मनीषा रुपनवर, श्री.कांबळे, बंडू पवार यांनी आपली मनोगते व्यक्त केली. सदर कार्यक्रमाचे प्रास्ताविक विद्यालयाचे पर्यवेक्षक श्री.जाधव यांनी केले. सूत्रसंचालन सौ उर्मिला भोसले यांनी केले. शेवटी आभार उपमुख्याध्यापक श्री.देवडे यांनी मानले.