जामखेड: माझ्या वाढदिवसाच्या निमित्ताने समाजासाठी, निसर्गासाठी आपल्या हातून थोडं-फार काम होत असेल तर माझ्यासाठी या कामाचा आनंद अधिक असल्याचे कर्जत-जामखेड विधानसभाचे आमदार रोहित पवार यांनी बोलताना सांगितले.
दि.29 सप्टेंबर रोजी आ.रोहित पवार यांच्या वाढदिवसाचे औचित्य साधुन रयत शिक्षण संस्थेचे श्री नागेश विद्यालय जामखेड याठिकाणी आयुर्वेदीक वृक्ष, खाऊ, मास्क व आयुर्वेदीक वृक्षाची माहिती पुस्तीका वाटप कार्यक्रम प्रसंगी आ.पवार बोलत होते.
आ.पवार पुढे म्हणाले की, आयुर्वेद ही भारताने जगाला दिलेल्या अनेक मौल्यवान गोष्टींपैकी एक देणगी आहे. आपल्या पूर्वजांनी, ऋषी-मुनींनी अनेक वर्षे अभ्यास करुन आयुर्वेदाला जगात मानाचं पान मिळवून दिलं. भारतामध्ये तर आयुर्वेदाला अनन्यसाधारण असं महत्त्व आहे. आपल्या पूर्वजांनी दिलेल्या या समृद्ध वारसाचं जतन व्हावं, निसर्गाचं संवर्धन व्हावं आणि आयुर्वेदाची माहिती सर्वत्र पोचावी, असा तिहेरी हेतू समोर ठेऊन यंदा माझा वाढदिवस हा आयुर्वेदाचा प्रचार-प्रसार करणारा आणि पर्यावरण संवर्धन करणारा व्हावा, असं ठरवलं आणि त्यादृष्टीने काम सुरू केले आहे.
यंदा 35 वा वाढदिवस असल्याने कर्जत व जामखेड या दोन्ही तालुक्यातील प्रत्येकी 35 हजार अशा एकूण 70 हजार विद्यार्थ्यांना आयर्वेदीक झाडांची रोपं भेट म्हणून देण्याचं निश्चित केले. त्यानुसार गेल्या दोन दिवसांपासून पहिली ते दहावीच्या विद्यार्थ्यांना खाऊ, मास्क आणि त्यासोबत वड, हिरडा, बेहडा, बेल, आवळा, करंज, जांभूळ, अशोक, काटेसावर, गुलमोहर, जास्वंद, पारिजातक, कढीपत्ता, गवती चहा, पुदिना या झाडांपैकी एक रोप देण्यात आलं. विद्यार्थ्यांनी आपल्या घरी हे रोप लावून त्याचं जतन करायचं. आपल्या आवडत्या व्यक्तीचं नाव त्या वृक्षाला देऊन त्याचा वाढदिवसही साजरा करायचा, अशी एकूण संकल्पना आहे. यामुळे झाडाचे आयुर्वेदिक महत्त्व हे विद्यार्थ्यांना व त्यांच्या कुटुंबियांनाही कळेल. विद्यार्थ्यांनाही ही संकल्पना खूप आवडली असल्याचे रोप देताना त्यांचे चेहरे सांगत होते. याशिवाय विद्यार्थ्यांना आयुर्वेदिक वनस्पतींची माहिती असलेले एक माहिती पत्रकही यावेळी देण्यात आलं. जेणेकरुन विद्यार्थ्यांनी आयुर्वेदाचाही अभ्यास करावा. प्रत्येक गावात सर्व प्रकारची झाडं जातील याप्रमाणे नियोजन करुनच झाडं देण्यात आली.
याशिवाय सध्या कोरोनाची साथ असल्याने एक लाख मुला-मुलींना खाऊसोबत मास्क आणि कोरोनाचा संसर्ग रोखण्यासाठी काय करावे, याबाबत जागृती करणारे पत्रक देण्यात आले. लहान मुलांना कोरोनाचा अधिक धोका असल्याने मतदारसंघातील अंगणवाडीतील 36 हजार मुलांनाही खाऊसोबतचं मास्कही देऊन एक सामाजिक काम करण्याचा छोटासा प्रयत्न केला आहे.
शेवटी यंदा विद्यार्थ्यांना दिलेले हे आयुर्वेदिक झाडांची रोपं ते लावतील आणि पुढील वर्षी त्यांचा वाढदिवस साजरा करतील, ते क्षण माझ्यासाठी अत्यंत आनंद आणि समाधान देणारे असतील. असे क्षण या विद्यार्थ्यांनी मला द्यावेत, ही अपेक्षा आणि वृक्ष संवर्धनासाठी त्यांना शुभेच्छा त्यांनी यावेळी दिल्या.